《石牆中開花 邵家臻談囚權說牆內現況》

近日天氣酷熱得叫人煩躁不安，監獄內的高溫更「焫着」一班在囚人士。囚權組織「石牆花」早前成功在33小時內收集逾10萬網民聯署，要求懲教署改善監房酷熱環境。​

​「石牆花」創辦人邵家臻得悉，署方人員在網民連署後稍有改善赤柱監獄的酷熱問題，「其實係講囚權咁耐，最成功、最有效率嘅一次。」他認為署方願即時作出反應，是因為社會大眾對聯署行動反應澎湃，加上懲教署一直飽受輿論壓力，惟他同時指出署方並非真正解決訴求，只是從制度層面作出回應，續舉例指署方原先已計劃在獄中加裝風扇，現只是加快進度，並非真正推出新措施。

「我哋淨係噏啲好平常嘅，入退熱貼或者手提式風扇仔？冇啦。沖涼沖多次？冇啦。飲水飲凍水？冇啦。飲唔熱既水？冇啦。屋頂要防曬塗層？冇啦。種花？冇啦。灑水？冇啦。如果好量化咁講，我噏咗六七個item你淨係做咗一個item，或者個item做快咗咋嘛。」​

其實獄政問題存在多年，監房酷熱只是其中一小部分，邵家臻一直提倡藉着獄政改革，捍衛在囚人士應有的權益。不過，懲教署眼中的持份者就只有管方與前線，未曾注重關注囚權的團體，更遑論在囚人士。他指，署方與在囚人士的關係只屬管治與被管治者，囚友一直處於食物鏈的最低層，「你所有嘅聲音、意見、反映都會被忽略、被滅聲，因為你只係一個被管治嘅object，唔係一個subject，更加唔係一個stakeholder，所以你見到改嘢係唔會通知你、唔會考慮你嘅意見、亦都唔會同你商量。」​

//由老師到「監躉」 一直爭取囚權//

邵家臻在2019年因佔中案被判入獄8個月，他笑言「監躉」身分對他來說別具意義。他形容，以前擔任社工系講師時，對弱勢社群的關懷很抽象，而成為議員後，他親身看到許多血肉故事，「但係到我自己坐埋監，我唔係淨係見佢哋，我見埋自己，我直頭住赤柱，每日都一齊生活。」真正的與其他囚友同呼吸、同喜樂、同哭泣，融為一體。他在獄中並沒有放棄爭取囚權，「坐監嘅時候我不斷『舉耙』（投訴），向太平紳士、立法會議員、署長、監頭、申訴專員公署投訴，我用盡晒啲投訴途徑，所以而家知道啲投訴途徑係有幾咁廢。」​

​

由社工到大學講師、立法會議員，再由在囚人士到今天成立「石牆花」，邵家臻的身分經歷多番轉變，但同樣也是為弱勢社群發聲。問及從前外展社工的工作，他簡單的以「虧欠」兩字作總結。「我去過探監，我亦都有啲case去過沙咀、壁屋，佢哋（少年犯）唔願意講裡面嘅遭遇，我都唔識得問。所以我做社工嗰陣時，可以話係同囚權擦身而過，其實我可以喺嗰陣時開始介入或者認識，但對唔住我係忽略咗。」​

他認為「好嘢係喺錯嗰度出嚟，冇做過錯事、冇帶住虧欠唔會有嘢好。」所以他會因帶著虧欠前行，他特別投入議員與民間團體的工作，盡力在囚人士爭取權益。「議員當然係喺倡議工作洋洋耍耍啦，因為你可以直接用公職身分、有公權力，可以攞在囚number、可以公務探訪、可以直接向官員問責，但議員工作太過忙碌，太多議題，好多時都會分咗心。忙碌得滯都只能蜻蜓點水式進行人道嘅關懷，但係而家冇咗議員身分，成立一個團體，當然冇晒啲洋洋耍耍，但多咗啲時間深耕細作。」​

​所謂的深耕細作，是指與在囚人士建立互信關係，花時間陪伴與傾聽。後來，​他預料到因社會運動而被判10年以上刑期的人會多達200個，故此成立囚權組織「石牆花」，以另一個形式協助手足與其家屬。​

//囚犯也是人//

​早於2017年，他成為立法會議員後，已開始為在囚人士爭取合理的薪酬待遇。四年過去，他已卸下議員身分，但在囚人士工資過低的問題仍未改善。他指，懲教署每年接下來自公營機構及政府部門的生意，市值大概有4億多元，惟支付予在囚人士的工資「4億幾入面嘅尾數都唔夠。」​

「點解要咁剝削呢？當然佢話呢個唔係工資嚟，話係incentive payment（作為鼓勵），其實兩舊水一個月有幾incentive呢？調返轉呢個係disincentive。好似今年加咗一毫子，一毫子喎！而裡面（在囚人士）係攞啲人工嚟買嘢食，但啲嘢食呢就貴過百佳喎。仆街！一來一回啲人咪好炆囉，冇辦法呀，賺錢少過人但係買嘢貴過人。」​

對於改善在囚人士的待遇，坊間有說法指：「對佢咁好做咩呀？你以為佢度假呀？坐監咋。」他們的確在法律上被判有罪、需要在制度內承​擔罪責，但他們在成為囚犯前與我們一樣，是個有血有肉的人。但邵家臻指，懲教並不把他們當成是人類，反而是死物一般愛理不理。他引程翔《千日無悔》說，「（囚友）好似監獄個『獄』字咁，一隻有狗爪邊、有個言字嘅犬，（懲教認為我地係）會說話嘅狗。我哋唔想做狗，唔想做死物，我哋想做返個人。」​

「當我每次聽到（懲教署自稱）人性化管理，我真係覺得難聽過粗口、虛偽到不得之了。人性化管理？我覺得係『管理化人性』，係佢哋個個都管理晒自己嘅人性。」​

//政治犯數量大增 懲教禁絕書信//

​隨着越來越多與反修例運動有關的人士被判入獄，獄中俗稱「暴動仔」的政治犯比例大幅增加，而邵家臻認為，政治犯與其他在囚人士相比，懲教署前線人員對前者更為苛刻，與署方「一視同仁」的說法截然不同。​

​失去自由的政治犯，每天只能對着四面牆，與外界接觸也需要比以前多花幾倍時間。閱讀與寫信，可能就是他們在牆內最大的娛樂，但「矯枉必須過正、且殺無赦」的署方開始在這方面僭建規則，實行禁書、禁信。「（過往）冇話會禁政治書，但係對住暴動仔，即係政治犯，就係所有反送中運動嘅書都禁。另外就係書信，（署方）對政治犯的信件就會左挑右剔，跟住就會話啲字唔得，又話有呢啲嘢唔得，甚至我哋囚權組織寄信俾政治犯，問下佢哋母親節使唔使送花、送禮物包俾屋企人，呢啲集體回條佢全部收起晒，話進行集體活動唔知有咩企圖。我覺得對於政治犯係多咗一重嘅監察。」​

//未來不會更好 堅持該做的事//

​​2021年的香港終日不見光，希望與我們的距離變得越來越遠。邵家臻說：「Hope is a dangerous thing。」他指當年佔中案，一眾泛民是因為散播希望而被判入獄，因此他認為在無望的地方更加要抱有希望，「我喺監房整咗個快樂細明表，我寫咗出嚟喺度數算快樂。喺最坎坷苦難嘅地方，我自己尋找快樂，因為meaning係自己搵，快樂係自製嘅。​」

但隨着政權打壓力度加強，不少人正面對無限期的還押，他指在新常態下「有刑期就係有希望。」他明白這個想法很「變態」，但卻是鐵一般的事實。「政府刻意地用無期還押去折磨佢哋，因為無期還押係好痛苦，因為根本唔知要搞幾耐，有好多懸念。」因此，他認為牆外的人應該時刻謹記「勿以善小而不為」，不要覺得事情太過微小而不願意去做，反而更應該小事多為，例如多寫信、探監、捐錢、買物資等，讓身陷獄中的手足知道大家從未忘記他們。他相信，每個人總有辦法讓自己扣連着這場社會運動，「我哋做咗呢啲嘢，佢哋都係要捱，不過係冇咁難捱。我覺得喺成個社會氣氛下面，我哋不妨多做小事。」

​爭取囚權及獄政改革並不是一朝一夕的事，邵家臻指他會持續以「石牆花」為囚友發聲，但他同時相信，在高壓管治下，任何人都不會是倖存者。「石牆花都唔會有倖存或者僥倖嘅心態，我哋都唔會咁戇居。如果唔係我哋身處喺呢個懸崖邊，或者踩緊鋼線，你哋都唔會上嚟訪問我哋啦。今日唔知聽日事，你都唔知下個月我哋仲係唔係度。大家心情都係一樣⋯⋯一種命運共同體，一種不安既共同體。」

#邵家臻 #石牆花 #囚權 #專訪 #胃癌病逝