日劇 - 東京女子圖鑑

因為最近有齣台北版，所以就搵原裝東京版睇吓會係點，或者可能有機會有個香港版呢。

當然身在香港，城鄉差距唔係咁大，女主角心理歷程未必會有太大共鳴，但係有啲嘢係共通嘅，女性喺呢個社會面對嘅問題係冇乜點變過。

「我想成為令人羨慕嘅女人。」

好似有啲好高騖遠呵，不過大家又何嘗唔係想咁，只不過換過講法啫，其實你都只不過想過得好啲，俾人認同嘅過得好啲，睇你平時social media show嘅嘢就知。

當然人類生活、成長，若果文化冇變，其實大家面對嘅都唔係差唔多，所以女主角面對嘅亦都係大家面對嘅問題，愛情、職場變化確實放諸四海皆準，人類從來都冇咩進步過。

或者細看下其實都有些微嘅變動，就係人際聯繫方法，係咪親密咗定係疏離咗呢？呢個當你再睇哩齣劇集嘅時候或者會有多啲感受。

值得再攞出嚟睇。