彩虹邨重建｜「打卡樓」上的住客 怎看重建？ 長者怕搬新美東邨「唔識路」
文｜集誌社記者
彩虹邨將分三期重建，第一期最快 2028 年展開，受影響住戶將遷往離彩虹邨約兩公里的黃大仙新美東邨。彩虹邨中逾三成居民為長者，《集誌社》走訪受影響的住戶，不少長者稱不欲搬往新美東邨，擔心交通不便、難以適應，「即係叫我哋去死」； 亦有人認為，只有第一期住戶無法原邨安置是「唔公平」。有九旬住戶則笑言，重建計劃比預期遲開展，「以前以為好快趣，點知揼吓揼吓揼到咁耐」，「唔知有冇命等到四年」。
彩虹邨將分三期重建，第一期最快 2028 年展開，涉及碧海樓、金碧樓、丹鳳樓，及兩所空置校舍。第一期受影響住戶，將遷至九龍城的美東邨，亦可遷往其他合適翻新公屋單位，或享居屋及綠置居優先選樓資格；餘下受第二期及第三期影響的住戶，則可原邨遷至重建後的新彩虹邨。
首期重建街坊：一係齊齊有得搬
現年 71 歲的黃先生，與兒孫一家六口，居於碧海樓近 20 年。他說，過去十年屋內廁所、廚房等多處有石屎剝落，「煮吓煮吓（石屎）跌晒落嚟 」，亦有鋼筋外露，房署曾多次派人維修，對上一次是一個月前。
他說彩虹邨「咁爛」，重建是好事，但覺得現時安排「唔公平」，「佢唔畀我哋搬返嚟啊嘛，第二期、第三期就有機會搬（回彩虹邨），第一期全部搬走，咁咪係唔公平」，「你話我哋鍾意搬返來就搬返來咁就好，你話唔可以，要搬去第二度，梗係唔鍾意啦。」
對於遷置安排，黃先生說，家中未有條件購買居屋，「我哋冇諗，諗都唔敢諗」；至於遷往美東邨，「我哋又唔想搬去嗰度，我哋咁老⋯⋯唔習慣喺嗰個地方活動，路都唔識行」。他說，彩虹邨交通方便，鄰近巴士和地鐵站，街坊亦「全部都好好」，常送零食給孫女，有次將家中物品搬到屋外大掃除，有鄰居更「以為我哋搬走，話唔好走」。黃先生說，住在彩虹邨多年，「我哋住開咗，幾十歲，習慣咗呢度，有感情」，希望能夠在原區安置，搬到第二、三期的空置單位。
住在碧海樓十多年的郭太，指得悉重建消息後，女兒因為不捨得，「喊咗成日」，不少街坊亦感到不滿，更收集簽名打算向當局反映。她自言一早打算購置居屋搬走，不打算搬往美東邨，因該邨交通、搭車、買餸也不方便，「絕對唔會諗」。對於重建方案，她同意彩虹邨規模大，可以分階段清拆，但質疑重建方案不公平：「有咩理由二期、三期可以搬返嚟，一期係冇吖？」，「一係齊齊有得搬，一係齊齊冇得搬，有乜理由淨係第一期冇得搬返嚟吖？」
88 歲梁先生：幾十歲喺山邊點買嘢啊
現年 88 歲的梁先生，先後在金碧樓、丹鳳樓住了逾 50 年，現與兒孫一家四口同住。丹鳳樓，即是遊客常在停車場平台球場「打卡位」拍攝的七彩公屋。住在「打卡樓」的他，同樣不想搬到新美東邨，指「我後生冇所謂，邊度都得」，但現在「我哋年紀大吖嘛，又冇記性，行都行唔郁，搬嗰邊咪即係叫我哋去死」。梁先生說，平時會以傘做拐杖，徒步到附近牛池灣街市買餸，及到坪石邨看醫生，一旦搬去美東邨，生活非常不便，「我哋都唔識路，幾十歲喺山邊點買嘢啊。」
梁先生反覆強調，「最好嗰邊（第二、三期）有空位比我哋過去住，起返好返呢度（第一期）就最好」、「就最開心」。他不介意屆時邨內進行工程，指以往金碧樓鄰近「機場」(飛機庫），早已習慣飛機升降的嘈音。
三、四年後便要搬走，梁先生坦言「梗係唔捨得啦」，指彩虹邨交通方便，而且「全部啲左右隔離有傾有講，你去到（美東邨）都冇人識啊嘛」。他則認為，現時單位仍很「實淨」，「有排住，住十零年都得。」
92歲陳婆婆：成日冧啲沙石落嚟
另一邊廂，有居民希望搬往美東邨，但「唔知有冇命等到四年」。住在金碧樓逾 60 年、92 歲的陳婆婆，笑言彩虹邨講重建「講咗幾十年」，「以為早啲搬新樓住，家陣咁耐，冇得住都唔定」。她說家中廚房、廁所等，過去十年開始「成日冧啲沙石落嚟」，水管亦會漏水，打風時要倒水出去，「壞又整、壞又整」，「舊到咁緊要」，因此希望搬去新美東邨。至於搬往第二、三期的空置單位，她則不會考慮：「呢度咁鬼舊，住多廿年咪仲舊！」她亦不打算「大屋搬細屋」，指屋內「咁多傢俬」，而且將來若搬去美東邨，兒子一家四口亦會搬來同住。
陳婆婆憶述，當年一家十多口居於九龍城一間房，至彩虹邨落成後獲分派單位，「梗係好開心，80 蚊租，搬嚟呢度咁大間」。她以往從事製衣，將雞、鴨、鵝毛製成羽絨等，50 歲時公司執笠，她也順勢退休，「湊吓仔，買吓餸、煮吓飯」。以前隔鄰左右都是相熟街坊，她閒時「過隔離坐吓」，打麻雀和傾偈，嫁女時「請晒佢哋食飯」，又會煲湯給鄰居；不過隨着年紀漸長，樓高七層的金碧樓又遲遲未安裝升降機（於 2010 年始安裝），不少老街坊陸續搬走、離世，鄰居很多均是新近搬來的人，最多只是見面講句「早晨」。
陳婆婆的丈夫因工作吸入過量塵埃，早於 30 多年前因哮喘去世，子女亦陸續結婚搬走、甚至離世，一個人住在金碧樓十多二十年。過去 20 年，她每天早上都會與十多名金碧樓街坊在樓下做運動，耍太極、易筋經、六通拳。她嘆重建後便「唔可以喺埋一齊㗎喇，啲人分開晒」，唯盼搬往新美東邨後，相熟街坊能住在附近。見證邨中變化，成為彩虹邨最老街坊之一，她坦言要重建會不習慣，但也看得很開：「唔緊要啦，住咗 60 幾年喇，住咗咁耐，好屋住到爛屋」。
至於住在丹鳳樓約 50 年、同為 92 歲的徐婆婆，對重建表示「順其自然」，「住到幾時咪幾時」，「我哋咁嘅年紀，冇得諗」。
集誌社檔案｜第一期居民「冇得留低」 遷住新美東邨
彩虹邨首期重建的居民，要「離區別邨」，搬往新美東邨。新美東邨對面為九龍寨城公園，屬黃大仙選區，與彩虹邨相距約兩公里。從彩虹邨往美東邨，需步行半小時，若由彩虹搭地鐵往樂富站，亦需步行約 15分鐘始到達。美東邨於七、八十年代落成的美東樓及美寶樓，於 2021 年清拆重建，預計於 2028 至 2029 年入伙，可提供 2,450 個單位，容納 2,030 名彩虹邨第一期受影響住戶。